Женнигийн алхсан Jacquemus-ын загварын шоуг дотроос нь харцгаая
Италийн Капри арал дахь Малапарте харшид цуглуулгаа дэлгэнэ гэдэг өөрийн брэндээ өлгийдөн авч байсан Симон Порт Жакмюсын мөрөөдөл байлаа. Түүний нүдэндээ төсөөлж байсан зураглал намар-өвөл 2024 улирлын “La Casa” цуглуулгаар нь дамжин 15 жилийн дараа бодит болоод байна.
Хүрэлцэн ирсэн зочид Малапарте харш руу зөвхөн завиар хүрч очих боломжтой байжээ. Ингэхдээ зарим тохиолдолд цаг агаарын нөхцөл байдлаас шалтгаалан усан тээвэр явах боломжгүйд хүрдэг гэнэ. Загварын шоуг зохион байгуулах явцад хэрэгцээт тоноглол, хэрэгслийг нисдэг тэргээр хүртэл зөөвөрлөх шаардлага гарсан байна. Аз таарч Jacquemus-ын шоу товлогдсон өдөр нар гийсэн, тогтуун цаг агаартай байсан ба “Эрсдэл үгүй бол гоо үзэсгэлэн үгүй” хэмээн Симон Порт Жакмюс тус байршлыг сонгосон шалтгаанаа тайлбарлажээ.
Намар-өвөл 2024 улирлын загварууд бүтээлч захирлын хэлж буйгаар урьд өмнөхөөсөө шинэлэг болжээ. Тэрээр секси байдлыг өөр өнцгөөс харуулахыг хичээж, маш реалистик бөгөөд минимал хэв шинжийг урьтал болгосон байна. Загварын шоуг модель Анок Яи нээсэн бөгөөд гэрийн халат мэт загвартай шаргал хүрэм болон өнгө ижил өсгийтөөр гоёжээ. Энэхүү төрх нь 1963 оны Le Mepris кинон дээрх Брижит Бардог санагдуулна. Тус бүтээл дээр яг л Jacquemus-ын шоун дээр харуулсан шиг шаргал өнгийн халат өмссөн Брижит Бардо Малапарте харшийн шатаар бууж буй хэсэг гардаг юм. Мэдээж хэрэг цуглуулгад дизайнерын нэрийн хуудас болсон элементүүд зонхилсон байна. Завин хэлбэртэй энгэрийн ухлаадас, А силуэт, бөмбөгөр ханцуй болон зөөлөн пастель өнгөнүүд нь Jacquemus-ын логог ч орлож чадахуйц таних тэмдэг мөн.
Аливаа брэндийг амьд байлгадаг зүйл бол худалдаг авагчид учраас Симон Порт Жакмюс тэднээс ирсэн шүүмжийг хүлээн авч, үйл ажиллагаандаа тусгахыг хичээдэг. Хэрэглэгчдийн зүгээс Jacquemus-ын хувцас хэдий загварлаг ч, чанарын стандартад хүрэхгүй байна гэсэн шүүмжүүд багагүй ирсэн тул бүтээлч захирал энэ удаа чанарыг чухалчилж үзжээ. Тэрээр “Би өдөр бүр ажиллаж, хийж байгаа зүйлээ улам сайжруулах чин хүсэлтэй. Би шинэ ноу-хау боловсруулахын тулд маш их үйлдвэрүүдтэй ажиллаж, олон цагийг зарцуулсан” гэсэн юм.
