Moschino брэнд The Sims видео тоглоомоос сэдэвлэсэн цуглуулга танилцууллаа
Бидний дуртай The Sims тоглоом бодит байдал дээр хэрхэн харагдах вэ?
Санаанд оромгүй загварын шийдлээрээ үргэлж гайхшруулдаг загвар зохион бүтээгч Жереми Скотт бидний тоглох дуртай The Sims видео тоглоомоос сэдэвлэсэн капсул цуглуулга танилцууллаа. The Sims тоглоомын бэлгэ тэмдэг болох Plumbob дүрс болон 16-bit хэмжээс зургуудаар чимэглэсэн футболк, өмд, юүдэнтэй цамц, даашинз болон ээмэг, цүнх, гар утасны гэр зэрэг аксесуарууд энэхүү цуглуулгад багтжээ.
Түүнчлэн цуглуулгын зураг авалтыг ч бас видео тоглоомыг санагдуулам байдлаар хийсэн нь загваруудыг бодит эсэхэд эргэлзэхэд хүргэж байлаа. "The Sims ертөнцийн дүрүүдийг бодит байдал дээр бий болгох нь үнэхээр таалагдлаа" хэмээн дизайнер Жереми Скотт цуглуулгын тухай ярьсан юм. Moschino x The Sims цуглуулга дөрөвдүгээр сарын 13-наас эхлэн худалдаанд гарахаар болжээ.
