Шинэ жилийн даашинзын хөтөч: Шилдэг 9 загвар
Энэ жил ямар даашинз өмсөх вэ?
Арванхоёрдугаар сарын хуанли тань шинэ жилийн үдэшлэгүүдээр дүүрч байна уу? Ажлын хамт олон, найз нөхдийн үдэшлэгээс эхлээд гэр бүлийн баярын уур амьсгалтай оройн зоог, албан ёсны хүлээн авалт гээд олон төрлийн төрх бүрдүүлэх шаардлагатай олон арга хэмжээ таныг хүлээж байгаа биз ээ. Сүүлийн хэдэн жилд бид "бага байх тусмаа сайн" гэх уриан доор минимал стильд автаад байсан ч, энэ оны баярын өдрүүдийг сэтгэл догдлуулам саа, гялтганасан материал, глэм шик хэв маягаар дүүрэн өнгөрүүлэхийг зөвлөж байна. Мэдээж бүх цаг үеийн найдвартай шийдэл болох хар өнгийн даашинз ба смокинг хослол зэргээс сонголтоо хийж болох ч илүү зоригтой байхыг хүсвэл доорх төрхүүдээс санаа аваарай.
Нил ягаан өнгө
Twin-Set
Pantone институтээс зарласан энэ оны гол өнгийг өмсөхдөө ягаан аксесуартай хослуулаад үзээрэй. Ингэснээр та загварын маш нарийн мэдрэмжтэй харагдана гэдэгтээ итгэлтэй байж болно шүү.
Гялалзуур чимэг
Zara
Бүхэлдээ гялалзуур чимгээс бүтсэн даашинз эсвэл комбинзон сонгосноор та үдэшлэгийн гялалзсан од нь байж, хаана ч очсон баярын уур амьсгал нэмэх болно.
Металлик туяа
Temperley London
Ерөнхийдөө энэ жил гялтганасан бүхэн зөв сонголт болно. Гутал, даашинз, аксесуар гээд өмссөн бүх зүйл тань гялалзсан материалтай байвал бүүр ч сайн шүү!
Урт ханцуйтай богино даашинз
Attico
Ийм загварын даашинз нь хэтэрхий ил задгай биш атлаа гуалиг хөлөөрөө гайхуулах боломжийг олгох давуу талтай.
1980-аад оны эсгүүр
Alessandra Rich
Өргөн мөртэй, тод өнгөтэй, хормой хэсгээрээ урт оноотой 1980-аад оны эсгүүр энэ жилийн хамгийн тренди сонголт юм.
1990-ээд оны эсгүүр
Nili Lotan
Мөн мэдээж 1990-ээд оны минимал "slip" даашинзыг мартаж болохгүй. Өндөр өсгийтэй сандаалтай хослуулаарай.
Корсет ба өргөн бүс
Cushnie
Эмэгтэй хүний галбирыг хамгаас илүү тодотгох чадвартай өмсгөл бол корсет ба өргөн бүсний хослол юм. Доор нь юбка эсвэл брюк өмд өмсөж болно.
Өдөн оруулгатай даашинз
Zuhair Murad
Загварын блогерууд ба street style оддын сүүлд дурлаад буй нэг загвар бол өдөн оруулгатай даашинз юм. Энэ нь гялалзсан материалын адил ямар ч үдэшлэгт баярын уур амьсгал нэмж, сэтгэл догдлуулах чадвартай билээ.
Бөмбөлгөн хээ
Alice + Olivia
Бөмбөлгөн хээтэй даашинзыг тунгалаг чулуутай гялалзсан том ээмэгтэй хослуулах нь төгс шийдэл биш байна гэж үү?
