Өчигдөр АНУ-ын Үндэсний хөл бөмбөгийн лигийн аваргын төлөөх финалын тулаан төдийгүй олон мянган үзэгчдийн тэсэн ядан хүлээдэг энтертэйнмент шоу гэдгээрээ дэлхий дахинд алдартай Super Bowl 2023 тэмцээн амжилттай зохион байгуулагдаж өндөрлөлөө. Энэ удаагийн Super Bowl тэмцээний халфтайм шоун дээр Барбадос улсаас гаралтай, дуучин Рианна өөрийн хит дуунуудаас бүрдсэн үзүүлбэрийг 13 минутын турш толилуулж үзэгчдийг жинхэнэ утгаар нь доргиож чадсан юм. Мөн түүний энэхүү үзүүлбэрийг 118 сая хүн телевиз болон бусад сошиал платформуудаар шууд хүлээн авч үзсэн нь Super Bowl тэмцээний түүхэн дэх хамгийн их үзэгчтэй халфтайм шоуны хоёрдугаарт бичигдэж эхэлжээ.

ДУУЧИН РИАННАГИЙН ХАЛФТАЙМ ШОУН ДЭЭРХ ЗАГВАРЫН ХЭВ МАЯГ

Энэ жил 35 нас хүрч буй дуучин бүсгүй долоон жилийн дараа Super Bowl тэмцээний халфтайм шоугаар тайзнаа эргэн ирэхдээ нисгэгчийн хувцаснаас санаа аван бүтээсэн Loewe брэндийн комбинзон болон цээживч, Alaïa загварын ордны хүрэм, бээлий, Jacob & Co брэндийн бугуйн цаг, мөн MM6 Maison Margiela, Salomon брэндийн хамтран гаргасан пүүзээр гоёсон байлаа. Мэдээж түүний энэхүү улаан монохром төрхийг түүнтэй олон жил хамтран ажиллаж буй хувийн стилист Жалил Уивер хариуцан ажилласан байна.

ДУУЧИН РИАННАГИЙН ГЭНЭТИЙН БЭЛЭГ

Тэрээр Super Bowl тэмцээнээр дамжуулан ахин бие давхар болсноо зарласан нь үзэгч фенүүддээ барьсан хамгийн том гэнэтийн бэлэг байлаа. Рэппер A$AP Rocky болон дуучин Рианна нар өнгөрөгч оны тавдугаар сарын 13-ны өдөр анхны хүүхдээ өлгийдөн авсан бөгөөд хоёр сарын өмнө TikTok платформоор дамжуулан хүүгийнхээ царайг ил болгосон ч нэрийг нь нууцалсан хэвээр байгаа билээ. Цахим ертөнцөд тэдний хоёр дахь хүүхдийн төрөх хугацаа болон хүйсийн талаар хүмүүс таамаглал ихээр дэвшүүлж буйгаас гадна дуучин бүсгүйн жирэмсэн үеийн хувцаслалт өмнө нь шуугиан дэгдээж байсны адил одоо ч мөн маш өндөр хүлээлтийг бий болгоод байна.

ОЛНЫ ТАНИЛ ЭРХМҮҮДИЙГ ҮЗЭГЧИЙН СУУДЛААС ТОЛЬДОХУЙ

ХАЛФТАЙМ ШОУНЫ АРД ЮУ БОЛЖ ӨНГӨРСӨН БЭ?

Super Bowl тэмцээний халфтайм шоун дээр үзүүлбэрээ толилуулах уран бүтээлчдэд тэмцээний зүгээс ямар ч төлбөр төлдөггүй, харин тэдний бүхий л зардал болоод продакшныг бүрэн хариуцаж ажилладаг талаар АНУ-ын Үндэсний хөл бөмбөгийн лигийн хэвлэлийн төлөөлөгч Жоанна Хантер Daily Star сонинд ярилцлага өгөх үедээ дурдаж байсан. Учир нь Super Bowl тэмцээний халфтайм шоунд оролцсон уран бүтээлчдийн эрэлт, цомгийн борлуулалт тэмцээний дараагаар огцом нэмэгддэг бөгөөд үүнийг Рианнагийн шоу батлан харууллаа. Түүний үзүүлбэрээс хойш хэдхэн цагийн дотор Spotify платформ дээр "Bitch Better Have My Money" дууны сонсолт 2600%, "Diamonds" дууны сонсолт 1400%, "Rude Boy" дууны сонсолт 1170%-аар өссөнөөс гадна Fenty Beauty-гийн интернэт хайлт 833%-аар өссөн үзүүлэлттэй байна.