Шавар дунд зохион байгуулагдсан Balenciaga брэндийн загварын шоу

Balenciaga брэндийн бүтээлч захирал Демна Гвасалиа юун түрүүнд урласан загваруудаа үгээр дамжуулан тодорхойлохоос татгалзаж буйгаа илэрхийлсэн ба хувцас худалдахын тулд ямар нэг утга санаа заавал шингээх албагүй, загвар бол нүдээрээ харж дүгнэдэг харааны урлаг хэмээн үзжээ. “Загварынхан аливаа зүйлийг хайрцаглаж, шошго хадахад юу юунаас илүү дуртай. Тансаг зэрэглэлийн, тансаг бус зэрэглэлийн, чөлөөт, кутюр, сайн, муу, эрэлттэй гэх мэтээр тодорхойлдог. Үнэн хэрэгтээ бүгд л адилхан, хэнд хамаатай юм” хэмээн хавар-зун 2023 цуглуулгынхаа захиандаа дурдаж, тансаг зэрэглэлийн загварыг өө сэвгүй, цэмцгэр, онцгой, үнэтэй харагддаг гэх шинжүүдээр ойлгох нь маш хязгаарлагдмал бөгөөд хуучинсаг гэх байр сууриа илэрхийлсэн юм.

Тиймдээ ч Гвасалиагийн урласан загварууд аливаа урсгал, жанраас ангид харагдаж байв. Цуглуулгад мото хэв маягтай савхин хүрэм, малгайтай цамц, шулуун силуэттэй жийнсэн өмд, гялалзсан шигтгээтэй торон цамцнаас эхлэн багадсан мэт харагдах куртка, гарын хэлбэртэй tote загварын цүнх, гурвалжин хоншоортой шигтгээгээр чимэглэсэн клог гутал зэрэг өөр хаана ч байхгүй загварууд зонхилжээ.

Загварын шоуг бүтээлч захирлын үзэл баримтлалтай төгс нийцдэг, зөвхөн өөрийн тогтоосон дүрмээр амьдарч, нийгмийн эсэргүүцэлтэй тулгарахаас эмээдэггүй Ие нээж алхсан нь арга хэмжээний төдийгүй Парисын загварын долоо хоногийн шуугиан дагуулсан мөчүүдийн нэгээр тодорсон билээ.