"The Dior Sessions"
Дизайнер Ким Жонс өнгөрсөн жилийн гуравдугаар сард Dior загварын ордны эрэгтэй чиглэлийн бүтээлч захирлаар томилогдож, зургаадугаар сард анхны цуглуулгаа танилцуулсан билээ. Түүнээс хойш уран бүтээлч Брайан Доннелли буюу KAWS, зураач Раймонд Петтибон, барималч Даниел Аршам нартай хамтран нийт таван цуглуулгыг бүтээсэн ба street wear давамгайлсан өнөө үед кутюр суурьтай түүний загварууд эрэгтэй загварын салбарт бяцхан хувьсгал хийсэн юм. Тэгвэл дизайнер Ким Жонс Dior брэндэд өнгөрүүлсэн нэг жилийн ойдоо зориулан гэрэл зурагчин Николай вон Бисмарк, Rizzoli хэвлэлийн газартай хамтарсан гэрэл зургийн цомгоо танилцууллаа. Энэхүү цомогт Кейт Мосс, A$AP Rocky, Такаши Мураками, Жүүд Лоу, Эдди Редмэйн, Деми Мур гээд салбар бүрийн алдартнууд Ким Жонсын урласан загваруудыг өмсөн хөрөг зургаа даруулжээ. "Би мөнхөд хадгалагдан үлдэх баримтыг үлдээхийг хүссэн" хэмээн Ким Жонс цомгийн тухай тайлбарласан ба Николай вон Бисмарктай хамтран ажиллахад үргэлж таатай байдаг учир түүнийг сонгосон болохоо онцолсон юм.
"The Dior Sessions" гэрэл зургийн цомог 120 ам.доллараар худалдаалагдах ба Amazon сайт дээрээс худалдан авах боломжтой байна.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт