Нью-Йоркийн загварын долоо хоногийн тав дах өдрийн зочид

Нью-Йоркийн загварын долоо хоногийн тав дах өдөрт Jeremy Scott, 3.1 Phillip Lim, Zac Posen болон Rag & Bone нар цуглуулгаа танилцууллаа. Арга хэмжээний үеэр хүрэлцэн ирсэн зочдыг сонирхоцгооё

Jeremy Scott-ын танилцуулга Манхэттен дахь шуудангийн түүхэн дурсгалт барилгад болж өнгөрсөн. Гаднаасаа Beaux Arts мэт, харин дотроо үргэлжилсэн үйлдвэрийн орчин нь хамгийн "хутгамал" загвар танилцуулсан цуглуулгатай зохицжээ. Жереми Скоттын 1960-аад оны төрхийг үзэхээр Анна Делло Руссо, Лей Лезарк, модель Коко Роша болон Жижи Хадид нар цугларчээ.

Арав дах жилийнхээ ойг тэмдэглэсэн 3.1 Phillip Lim-ийн танилцуулга мөн энэ үеэр танилцуулагджээ. Дашрамд дурдахад, энэ жилийн загварын долоо хоногт Alexander Wang-ийн ой мөн тохиосон билээ. Ванг зочдоо цуглуулгаа танилцуулахаар урьсан бол, Филлип Лим орчин үеийн уран бүтээлч, уран барималч Майа Линг урин, түүний арга хэмжээнд зориулан шороогоор хийсэн бүтээлийг дэлгэсэн юм. Зочдын дунд Алекса Чанг, Соланж Ноулз, Айрис Апфель болон Брайан Бой нар байлаа.

Zac Posen танилцуулгаа хийхээр Нью-Йоркийн төв галт тэрэгний буудлын барилгад зочдоо цуглуулжээ. Тус байшин хотын хамгийн эртний бөгөөд  алдартай барилгуудын нэг юм. Урд эгнээнд жүжигчин Белла Торн, Женнифер Хадсон болон Кристина Хендрикс нар харагдлаа.

Rag & Bone танилцуулгын зочид гол гатлан, Бруклинд очих хэрэг гарчээ. Эргийн DUMBO дүүрэг дэх хуучин агуулах байсан газрыг орчин үөийн танхим болгон засаж, цонхноос нь Бруклины гүүр харагдаж аж. Анна Винтур, Лей Лезарк, Кирнан Шипки, Хэйли Болдуин нараас гадна загварын ертөнцийн хэдэн арван хүмүүс болон энгийн үзэгчид багтжээ. Givenchy-гийн дараа Rag & Bone-ы дизайнерууд танилцуулгаа нийтэд нээлттэй болгохоор шийдсэн юм. Очихыг хүссэн бүхэн Uber-т аяллын захиалга өгч, тасалбар хожих сугалаанд оролцох боломжтой байжээ.