Чиг хандлага: Нил ягаан уруул
Анхаараарай, нүүр будалтын хэв маягт мартагдах шахсан өнгө эргэн ирлээ. Бүсгүй таны гоо зүйд жавхаа нэмэх нил ягаан өнгө энэ жил онцлох сэдвүүдийн нэг боллоо. Хамгийн дур булаах хэсэг болох уруулын гоо сайханд нил ягаан өнгө хүч түрэн орж ирж байгаа нь яг л цагаа олсон гэлтэй. Будаагүй мэт будалт, хөнгөн суурьтай удаан тогтоцтой энгэсэг, үл ялиг бүдэгхэн зурагдах хөмсөгний харандаа гээд энгийн даруу гоо байдал мэдээж бидний мөнхийн дүрэм. Харин уг дүрмээс ямар ч эмэгтэй хазайж чаддаг бөгөөд ингэхдээ өөртөө ямар нэгэн туршилтыг хийж чаддаг.
Энэ удаа таны сонголтод нил ягаан өнгийг бид санал болгож байна. Яагаад үгүй гэж? Нүдний будалт дээр ховор ажиглагддаг байсан нил ягаан өнгийг нүүр будалтын мэргэжилтнүүд тэгтлээ их санал болгож байгаагүй гэж дүгнэж болно. Харин 2025 оны хавар зуны нүүр будалтын тренд нил ягаан өнгийг уруулын будгаар гаргаж байгаа нь түлхүү ажиглагдлаа. Зун цагийн аагим халуун өдрийг нил ягаан өнгийн уруулаар угтаж сэрүүхэн, хүйтэн тод өнгөөр жаргаая.
