"Emily in Paris" Алтан Бөмбөрцөг наадамд нэр дэвших ёсгүй байсан уу?
Наадмын зохион байгуулагчдыг хахууль авсан хэмээн буруутгаж байна
Энэ сарын эхээр Алтан Бөмбөрцөг наадмын нэр дэвшигчид тодорсон билээ. Нэр дэвшсэн бүтээлүүдийн дунд Netflix-ийн "Emily in Paris" цуврал орсон байсан нь олон хүнийг гайхшруулаад авсан. Учир нь бэлгийн хүчирхийллийн тухай өгүүлсэн, асар өндөр үнэлгээтэй HBO сувгийн "I May Destroy You" цуврал нэр дэвшигчдийн дунд багтаагүй байхад "Emily in Paris" орсон байсан нь олон хүний дургүйцлыг хүргээд байгаа юм.
Үүнээс болж кино шүүмжлэгчид наадмын шүүгчдийг арьс өнгөөр ялгаварлан гадуурхах үзэл гаргасан хэмээн буруутгасан байна. Тэр ч бүү хэл "Emily in Paris" цувралын кино зохиолч Дебора Копакен өөрийнх нь бүтээсэн цуврал нэр дэвшсэнд баярласан ч "I May Destroy You" хасагдсанд гайхсанаа илэрхийлжээ. Тэрээр "I May Destroy You бол миний хамгийн дуртай цуврал. Энэ цуврал бэлгийн хүчирхийллийн сэдвийг хөндсөн. Би өөрөө ч бэлгийн дарамтыг туулж үзсэн. Бидэнтэй өөрийн зүрх сэтгэл, оюун санаа, хошин шогийн мэдрэмжээ хуваалцсанд баярлалаа" хэмээн цувралыг бүтээсэн Микаэла Коэльд хандан бичжээ.
Dear @MichaelaCoel: I was a writer on Emily in Paris, but your show was my favorite show since the dawn of TV, & this is just wrong. I loved I MAY DESTROY YOU, and I thank you, personally, for giving us your heart, your mind, your resilience, & your humor. https://t.co/5KcTVdkZLQ
— Deborah Copaken (@dcopaken) February 3, 2021
Түүнчлэн олон хүн Алтан Бөмбөрцөг наадмын зохион байгуулагчдыг системчилсэн арьс өнгөөр ялгаварлан гадуурхах үзэлд буруутгаж байна. Үүний зэрэгцээ Los Angeles Times сонин өөрсдийн гэсэн мөрдлөг явуулж, энэ хэргийн хамаг учир хээл хахуульд байгааг олж тогтоожээ. Тодруулбал Алтан Бөмбөрцөг наадмын оролцогчид болон ялагчдыг 87 олон улсын сэтгүүлчдээс бүрдсэн Холливүүдийн гадаад хэвлэлийн агентлаг (HFPA) шалгаруулдаг. Тэгвэл 2019 онд тэдгээр 87 гишүүнээс 30 гаруй нь "Emily in Paris" цувралын зураг авалтын талбайд зочлохын тулд Парис хотод нисэж ирсэн байна. Улмаар тэд Peninsula Paris нэртэй таван одтой зочид буудалд (хоногийн 1,400 ам.доллар) хоёр хоног буудаллаж, Musée des Arts Forains музейд хоолложээ. Энэ бүх зардлыг "Emily in Paris" цувралын сурталчилгааг хариуцдаг Paramount Network компани төлжээ.
'Emily in Paris' creators flew Golden Globes voters to France, @latimes reports.
They were treated to two nights at the five-star Peninsula Paris hotel, “where rooms start at about $1,400 a night" and attended a meeting & lunch at the historic and private Musée des Arts Forains. pic.twitter.com/vXM3ZIuG2P
— Pop Crave (@PopCrave) February 23, 2021
Энэ талаар агентлагийн зарим гишүүд тайлбар өгч, тэдэнд өөрчлөлт хэрэгтэй байгааг онцолжээ. "Бид олон нийтийн сөрөг реакцтай тулгарсан. Ингэх нь ч зөв. Энэ бүтээл 2020 оны ямар ч шилдэг цувралын жагсаалтад ороогүй. Энэ бол бидэнд өөрчлөлт хэрэгтэй байгааг харуулсан маш тод жишээ" хэмээн нэрээ нууцалсан нэгэн гишүүн ярьжээ.
