Burberry брэнд дараа зун дотуур хувцсаа гадаа өмсөхийг уриаллаа
Английн алдарт Burberry брэнд нь хатан хаан II Элизабетэд эмгэнэл илэрхийлэн хавар-зун 2023 загварын шоугаа тодорхойгүй хугацаагаар хойшлуулснаа мэдэгдээд байсан. Тэгвэл өчигдөр буюу хатан хаантай салах ёс гүйцэтгэх ёслол болсноос долоо хоногийн дараа Burberry брэнд шинэ цуглуулгаа олны өмнө дэлгэлээ. Арга хэмжээг үзэхээр Йе, Headie One, Дэниел Калуя, Клоуи Бэйли зэрэг эрхмүүд хүрэлцэн ирсэн бол загварын тайзнаа орчин цагийн It моделиуд болох Белла Хадид, Мика Шнайдер, домогт Наоми Кэмпбелл болон Ирина Шейк нар алхжээ.
Загварын ордны бүтээлч захирал Риккардо Тиши энэ удаагийн цуглуулгаа дулаан уур амьсгалтай Их Британийн зуны улирлаас сэдэвлэн урласан байна. Риккардо Тиши тэр дундаа хүмүүсийн дэлхийн өнцөг булан бүрээс зорин очдог Их Британийн далайн эргийг онцолж, тухайн орчинд авдаг тайвшрал, эерэг байдал, аз жаргал зэрэг энгийн атлаа үнэ цэнтэй мэдрэмжийг хувцсаараа дамжуулан хүргэхийг урьтал болгосноо хэлсэн юм.
Цуглуулгад нарны туяанд гандсан мэт харагдах деним загварууд, усан цэнхэр өнгийн атласан даашинз, усны хувцас, Burberry-тэй салшгүй холбоотой сонгодог тренч болон бусад загварууд багтжээ. Мөн дизайнер өнгөрсөн улирлаас эхлэн чиг хандлага болоод буй дотуур хувцсыг гадуураа өмсөх стилистик аргачлалыг хэрэгжүүлж, 2023 онд ч гэсэн үргэлжлүүлэхийг уриалсан байна.
