Buro 24/7 тойм: Gucci, намар-өвөл 2016
Бүгд нэг доор
Өнөөдрийн Gucci-г харахад энэхүү загварын ордон өмнө нь тэс ондоо хэв маягтай байсанд итгэхийн аргагүй мэт санагдах юм. Брэндийн өмнөх бүтээлч захирлууд болох Том Форд ба Фрида Жаннини нарыг бүгд аль эрт мартаж орхисон. Урт үстэй, сэтгэл татам Алессандро Микеле бусдаас онцгойрч чадсан. Гэхдээ дизайнерын эхний хэдэн цуглуулгыг харсан үзэгчид түүнийг эмээгийн юбка ба берет малгай өмссөн "номын сангийн" бүсгүйгээс өөр төрх харуулж чадах болов уу хэмээн эргэлзэж эхэлсэн. Харин намар-өвлийн цуглуулга дизайнерыг өргөн хүрээтэй сэтгэхүйн гайхамшигийг баталж өглөө.
Алессандро Микеле мэдээж хэрэг дизайнер-дизайнер биш, харин стилист-дизайнер юм. Энэ нь юу гэсэн үг бэ гэхээр тэр шинэлэг дүрс, эсгүүр гэхээсээ илүү шинэ төрлийн чимэглэл, хувцас хоорондын зохицол, өнгөний сонголтыг санал болгодог. Бүтээлч захирлын суудалд очихоосоо өмнө Gucci-гийн аксесуарыг хариуцан ажиллаж байсан тэрбээр загварын ордны түүх, үнэ цэнийг сайтар мэддэг. Тэр энэ мэдлэгээ ашиглан брэндийн эртний түүхэн дэх загваруудыг шинэлэг аргаар чимэглэж, өвөрмөц байдлаар хооронд нь хослуулж, цоо шинэ төрх гаргаж ирдэг. Тиймээс л түүний шинэ цуглуулгаас хүн бүр хүссэн зүйлээ олж харах болно. Цуглуулга үнэхээр л 1940, 60, 70, 80-аад онуудыг нэгэн зэрэг өөртөө багтааж байгаа. Ерөнхийдөө бидний эрин үе буюу XXI зууны 10-аад оны загварын ертөнц яг л ийм холимог хэв маягаар тодорхойлогдох байх. Өнөөдөр бүх л зүйл "мода"-нд орж, хүмүүс хүссэн бүхнээ, хүссэнээрээ хослуулж өмсөх эрхтэй болсон шүү дээ.
Шинэ цуглуулга уламжлалт ёсоороо маш тод бас этгээд хэв маягтай болж, зоригтой хэрэглэгчдэд зориулагдсан байна. Цуглуулгад ямар нэгэн тодорхой сэдэв байхгүй мэт харагдлаа. Зөвхөн этгээд төрх л бүх загваруудыг хооронд нь нэгтгэж байлаа. Коовт цамц дээрх эрвээхий зангилаа, хуниастай, гялалзсан юбка, хээ угалзтай хослол, эмээгийн цамц гэх зэрэг шинэ Gucci-гийн нэрийн хуудас болохуйц загваруудыг Микеле намрын цуглуулгадаа дахин нэг удаа авч үлджээ. Түүнчлэн дизайнерын хайртай дүр зургуудыг илэрхийлсэн хатгамлууд шинэ загваруудаас харагдлаа. Даашинзны энгэр дээгүүр мөлхөх могой, цамцан дээр суух шувуу, свитер дээр харайх ирвэс гээд олон сонирхолтой дүр зураг бий.
