Хүн төрөлхтнийг бэлгэдсэн Фаррелл Уильямсын шинэ цуглуулга
Фаррелл Уильямс өнгөрсөн жилээс Louis Vuitton-ы бүтээлч захирлын албыг гүйцэтгэж эхэлсэн билээ. Тэрээр өөрийн дебют цуглуулгаар дамжуулан шинэлэг монограм хээ зохион бүтээснийг түүний шүтэн бишрэгчид болон загварын хорхойтнууд санаж байгаа биз ээ. Мөн Фаррелл загварын шоуныхаа хүрээнд Jay-Z-г дуулуулсан төдийгүй нэг сая ам.долларын цүнх толилуулж урлаг, загвар, энтертайнментыг тун чадварлагаар хослуулж болдгийг үзүүлээд амжсан. Тэгвэл бүтээлч захирал саяхан хавар-зун 2025 улирлын шинэ цуглуулгаа толилуулаад байна.
Тэрээр цуглуулгаа олонд дэлгэхээс өмнө өөрийн @skateboard Instagram хаягтаа дизайн туурвих үйл явцаасаа цухас хуваалцсан билээ. Үүнийг нэг нь брэндийн логог нэг талд нь дүрсэлсэн AirTag-ын бичлэг байсан юм. Тухайн төхөөрөмжийг шоунд уригдсан зочдод бэлэг болгон барьсан нь удалгүй ил болсон билээ. Түүнчлэн тус хаяг дээр LE MONDE EST À VOUS буюу Дэлхий бол биднийх гэсэн график бичиглэлтэй деним хүрмийн зураг нийтлэгдсэн юм. Мөн үүнтэй зэрэгцэн Louis Vuitton африк соёлыг түгээх зорилготой Air Afrique платформтой хамтарч буйгаа дахин нэг постоор дамжуулан зарлаад авсан. Тус платформ нь 1961-2002 онд үйл ажиллагаагаа явуулж байсан Air Afrique агаарын нисэх онгоцны компаниас сэдэлжин байгуулагдсан гэдэг. Air Afrique компанийг Африкийн нийт 11 улс Францын колониос чөлөөлөгдсөнийхөө дараа үүсгэн байгуулсан түүхтэй бөгөөд тэдний эрх чөлөө, тусгаар тогтнолын бэлгэ тэмдэгт тооцогддог юм.
Хавар-зун 2025 улирлын цуглуулга эх дэлхий дээр амьдардаг хүн нэг бүрийг алдаршуулах зорилгоор хийгдсэн байна. Фаррелл Уильямс эх дэлхийг яг л тэнгэр дээрээс тольдож буйгаар төсөөлж дэлхийн хүн бүр нэгдмэл гэсэн санааг өөрийн чиг баримжаагаа болгожээ. Тиймдээ ч загварын шоу Парисын ЮНЕСКО-гийн байранд зохион байгуулагдсан байна. Тус бүтээн байгуулалт нь дэлхийн өнцөг булан бүрд энх тайвныг тогтоох бэлгэдлээр 1958 онд баригдсан түүхтэй.
Шоуг нээж тас хар өнгийн хамбан хослолтой моделиуд алхсан билээ. Хар өнгөөр эхэлсэн моделиудын төрх аажимдаа гүн бор, бүдэг бор, элсэн цагаан, сувдан цагаан гэхчлэн цайвар туяа руу шилжиж байв. Энэ нь хүн төрөлхтний арьсны өнгийг илтгэж, бүгд үзэсгэлэнтэй гэсэн санааг агуулж байгаа аж.
Цуглуулгад багтсан загваруудыг холоос ажвал цулгуй бөгөөд гөлгөр материалтай мэт сэтгэгдэл төрнө. Гэвч эдгээр хувцас нь ойроос товгор хээ, дамуфляж (Фарреллын анхны цуглуулгад багтсан шатрын хөлгөөс сэдэвлэсэн камуфляж хээ) хээ, монограм лого гэхчлэн нарийн деталиудыг өөртөө шингээжээ. Үүгээр дамжуулан хүний арьс болон үүний нарийн төвөгтэй бүтцийг илэрхийлэхээр зорьсон байна.
