Хиймэл оюун ухаанаар бүтээгдсэн мэт Rick Owens брэндийн цуглуулга

Өвөрмөц, тэрслүү бүтээлээрээ алдартай загварын ертөнцийн “эсэргүү” гэгддэг Рик Оуэнсын бүтээлч хязгаар тэлсээр. Түүний туурвилууд үзэсгэлэнтэй, бас сүрдмээр болж чаддаг бөгөөд хэрэв хар өнгө хувцас байсан бол яг л Оуэнсын загварууд шиг харагдах байсан болов уу. Мөн бүтээлч захирлын гаргадаг эсгүүр, силуэт, өнгө будаг нь орчноос тасрааж Rick Owens-ын зохиомол ертөнц рүү аваачих шиг болдог. Намар-өвөл 2024 улирлыг тэр энэ л эрчээрээ эхлүүлж байна.

Тэрээр загварын шоугаа өөрийн Парис дахь гурван давхар таунхаустаа зохион байгуулжээ. Бетонон шалтай, өвөрмөц декорууд өрөгдсөн гэрээ Оуэнс “бетонон ордон” гэж тодорхойлдог байна. Энэ жил Rick Owens-ын 30 жилийн ой тохиож байгаа ба түүний гэрт брэндийн анхны цуглуулгууд дэлгэгдэж байсан гэдэг утгаараа тус байршлыг сонгожээ. Мөн намар-өвөл 2024 цуглуулга нь “Porterville” гэх нэртэй бөгөөд энэ нь дизайнерын төрж өссөн хот юм.

Загварын шоуг Рик Оуэнсын урлагийн тэнгэр гэгддэг Тайрон Дилан нээн алхжээ. Тэрээр ноосон комбинезоны цээж хэсгийг нь доош унжуулан өмсөж, цуглуулгын онцлох загвар болсон хийлсэн бөмбөлөг мэт харагдах гуталтай хослуулсан байлаа. Энэхүү гутлыг Rick Owens Лондонд суурьшилтай, өвөрмөц силуэттэй, геометрийн дүрстэй загварууд дээр түлхүү ажилладаг дизайнер Straytukay-тэй хамтран урласан юм. Үүнээс гадна цуглуулгад толгой давсан өндөр захтай куртка, oversized ч гэхэд багадахаар аварга том үслэг хүрэм гэхчлэн хиймэл оюун ухаанаар бүтсэн гэмээр гадуур хүрмүүд багтжээ. Мөн дизайнер энэ цуглуулгадаа унадаг дугуйны хаммерыг сэргээн засварлаж нүүрний хаалт хийхэд ашигласан байна.