Кайл Маклахлан, Жефф Гольдблюм болон бусад алдартнууд Prada брэндийн намар-өвөл 2022 эрэгтэй цуглуулгад

Prada загварын ордны намар-өвөл 2022 эрэгтэй цуглуулгын гол санаа нь футуризмыг харуулахад оршжээ. Энэхүү санааг Миучча Прада, Раф Симонс нар сансрын нисгэгчийн хэв маягтай комбинзон, урт ханцуйтай бээлий, гурвалжин хэлбэртэй үүргэвчээр илтгэн харуулав. Мөн тэд ретрофутуризмыг Prada-ийн үндсэн силуэттэй хослуулсан байв. Тухайлбал, бомбер хүрмийг макси урттай урлаж, бэлхүүс тодотгох бүстэй загварчилсан бол давхар энгэртэй пиджак, пальтог 1990-ээд оныг санагдуулам аварга том мөртэй болгож хийсэн байна. Цуглуулгыг бүтээх урам зоригоо дүрслэх урлаг, киноноос авсан гэдгээ Раф Симонс онцолсон бөгөөд тэр дундаа Стэнли Кубрикийн найруулсан “2001: A Space Odyssey” кино гол чиглүүлэг нь болжээ. Тухайлбал, загварын шоуны тайзны заслын санааг тус уран бүтээлээс авсан байна.

Моделиудын хувьд Кайл Маклахлен шоуг нээж, араас нь Эйс Баттерфилд, Томас Сэнгстер нар алхсан бөгөөд хамгийн сүүлийн төрхийг Жефф Голдблюм толилуулсан юм. Тус бүрэлдэхүүн нь Уиллем Дефо, Гэри Олдмен, Тим Рот, Жейми Белл алдартнууд алхсан Prada загварын ордны 10 жилийн өмнөх буюу намар-өвөл 2012 цуглуулгыг эргэн санууллаа.

Загварын салбарын шүүмжлэгчид, мэргэжилтнүүдийн дунд тус цуглуулга нь багагүй шүүмжлэл дагуулаад байна. Бүтээлч захирлууд чиг хандлагатайгаа хөл нийлүүлэн алхсан хэмээн магтсан нэгэн нь байсан ч өөрсдийн гэсэн хэв маягаа алдаж, ямар ч шинэлэг зүйлгүй болсон хэмээн хатуу шүүмжилсэн нь ч байлаа.