"Share the Joy" аянд нэгдэж бяцхан хүүхдүүдийг баярлуулцгаая

Шинэ жилийг яагаад хамгийн гоё баяр хэмээн олон хүн санал нэгтэй хариулдаг гээч? Гадаа жавартай, тачигнасан өвлийн хүйтэнд ч сэтгэлд үргэлж халуун дулаан мэдрэмж төрүүлж, ид шидэд итгүүлж чаддаг учраас тэр биз ээ. Ялангуяа бяцхан хүүхдүүдийг баярлуулж, тэднийг жаргалтай байхыг харах нь шинэ жилийн баярын гайхамшгуудын нэг мөнөөс мөн. Тэгвэл энэ жил Шангри-Ла Төв болон Сентрал Тауэрын зүгээс шинэ жилийг илүү утга учиртай болгохоор S Rewards лоялти аппликейшны гишүүдтэй хамтран “Share the Joy” нэртэй сайн үйлсийн аяныг эхлүүлжээ.

Энэхүү сайн үйлсийн аяны хүрээнд S Rewards лоялти аппликейшны гишүүд өөрийн цуглуулсан лоялти онооноос 10,000 оноогоо зарцуулан “Share the Joy” бэлгийн багцыг авах боломжтой юм. Харин таны худалдан авсан бэлгийн багц Ид Шидийн Орон 2-р төв болон Кристина Ноблийн Хүүхдийн Сангийн бяцхан хүүхдүүдэд очиж, тэдний баяр дээр баяр нэмэх болно.

Бэлгийн багцад хүүхэд бүрийн хамгийн дотнын найз болох чихмэл тоглоом, дархлаа дэмжих бүтээгдэхүүн мөн Шангри-Ла Төвийн гуравдугаар давхарт байрлах Adventure Zone тоглоомын төвд тоглох эрх зэрэг багтсан болно. Хэрэглэгч таны лоялти оноогоороо авч буй бэлгийн багц баярын өдрүүдээр хүргэгдэх ба хүлээн авч буй хүүхэд, багачуудын шинэ жилийн баярыг онцгой бас мартагдашгүй болгон тэдэнд баяр хөөр бэлэглэнэ гэдэгт итгэлтэй байна.