MPDU Fashion Week: KADR брэндийн "Ялгаварлан гадуурхалтыг зогсооцгооё" уриатай цуглуулга

Загвараар амьсгалсан үдшийн хамгийн өнгөлөг төрхүүдийг бид “MPDU Fashion Week”-д анх удаагаа оролцож буй KADR брэндийн цуглуулгаас харсан юм. Дизайнер Кадр энэхүү цуглуулгыг урлахдаа “Хотдоо өнгө нэмэн алхацгаая. Ялгаварлан гадуурхалтыг зогсооцгооё” гэх уриаг баримталсан бөгөөд саарал орчинд гэрэл түгээх неон ногоон, ягаан, шар өнгийн цоглог загваруудыг толилуулсан билээ. Тэдгээрийг бүтээхдээ дизайнер савхи, латекс, хамба хилэн болон үслэг материалуудыг түлхүү ашиглажээ.

Цуглуулгад макси урттай тренч, oversize силуэттэй пиджак, мини юбка, корсет, брюк, топ, пиджакнаас бүрдэх хослол гээд сүүлийн үед өндөр эрэлттэй байгаа загварууд багтсан ба загвар бүрт брэндийн этгээд өнгө аяс шингэжээ. Цуглуулгынхаа стайлингийг хийхдээ Кадр ретузэн суурь боди дээр хувцаснуудаа давхарлаж KADR гэх том бичигтэй өвөрмөц шилнүүдээр төрхийг чимэглэсэн байлаа. Түүнчлэн дизайнер эрэгтэй моделиудыг өндөрлөсөн мөртэй час улаан өнгийн цув, ирвэсний хээтэй корсет болон олон давхар хормойтой, макси юбка, хар пиджакаар гоёсноор хүйсгүй загваруудаа онцолсон юм. Уг цуглуулгаараа дамжуулж тэрээр ямар нэг хэмжүүр, хил, хязгаар байхгүй гэх санааг харуулахыг зорьсон нь дотоодын загварын шоуны тайзнаа дутагдаад байсан шинэлэг уур амьсгалыг нэмлээ.