Александр Ванг өөрийн нэрийн брэнд үүсгэхэд туслах хөрөнгө оруулагч олсон уу?
Шинэ амьдрал
Александр Ванг Balenciaga-гийн бүтээлч захирлын албан тушаалаа орхиод долоо хоног өнгөрч байна. Энэ талаар тэрбээр "Өөрийн брэндийг хөгжүүлэх ажилдаа төвлөрөхийн тулд францын Balenciaga-г" орхисон гэжээ. "Юуны түрүүнд би Balenciaga-гийн хамт олонтойгоо хамтдаа бүтээсэн бүхний төлөө гүнээ талархал илэрхийлмээр байна. Харин одоо би өөрийн брэндийг хөгжүүлэхээр ажиллаж байгаа бөгөөд хөрөнгө оруулагчийн эрэлд гараад хэдэн сар болж байна" хэмээн 7 дугаар сарын 9-нд WWD-д өгсөн ярилцлагадаа Ванг хэлжээ.
Харин өчигдөрхөн тэрбээр General Atlantic-ийн гүйцэтгэх захирал Вильям Форлтой хэлэлцээр хийж буй талаарх мэдээ хэвлэллээр цацагдлаа. General Atlantic хөрөнгө оруулалтын компани нь Tory Burch, Oak Hill Advisor болон Markit гэх зэрэг компаниудтай хамтарч ажилласан туршлагатай юм байна.
Одоогоор энэ мэдээлэлд аль ч тал албан ёсны хариу хараахан өгөөгүй байна. Гэвч загвар зохион бүтээгчийн өөрийн брэндийг идэвхтэй хөгжүүлж байсан нь Balenciaga болон Ванг нарыг салахад хүргэсэн байхыг үгүйсгэхийн аргагүй. Түүнчлэн саяхан Лондонгийн Albemarle Street дээр Alexander Wang-ийн томоохон дэлгүүр нээгдсэн нь энэ таамаглалыг улам бататгаж байгаа юм.