The Fashion Awards 2023: Загварынхны бүрдүүлсэн улаан хивсний төрх

Лондон хотын Royal Albert концертын танхимд загварын салбарын шилдгүүдийг тодруулдаг The Fashion Awards 2023 шагнал гардуулах ёслол зохион байгуулагдлаа. Тус наадамд Памела Андерсон, Энн Хэтэуэй, Гвинет Пэлтроу, Stormzy, Жонатан Андерсон гэхчлэн салбартаа түүчээлэгч моделиуд, дизайнерууд болон Холливүүдийн одод хуран цугларчээ.

Алдартнууд наадмын улаан хивсний ёслолд бороо шивэрсэн цаг агаарын нөхцөл байдлыг үл хайхран гоёмсог төрхөө бүрдүүлэн ирцгээжээ. Тэднээс Кейт Моссын өмссөн Saint Laurent-ын хар даашинз, Тейлор Расселлын сонгосон металлаар хийсэн Loewe-гийн топ, Энн Хэтэуэйн Valentino-гийн винтэж даашинзтай төрх анхаарал татлаа. Мөн дуучин Рита Ора дан ганц хувцаслалт дээрээ ач холбогдол өгөөд зогсохгүй нүүр будалтын артист Исамая Френчтэй хамтран нуруун дээрээ очир алмаз шигтгэсэн мэт боди артыг толилуулсан юм. Үүнээс гадна улаан хивсний хамгийн даруу гэж тодорхойлж болохуйц Памела Андерсоны төрхийг онцлох нь зүйтэй. Тэрээр өнгөрсөн улирлын загварын долоо хоногийн үеэр минимал имиж бүрдүүлэлтээрээ хүмүүсийн гайхширлыг төрүүлээд байсан. Тэгвэл энэ удаа ч мөн Андерсон сүүн цагаан цэмцгэр хослол өмсөн ямар нэг нүүрний будаггүйгээр улаан хивсэн дээгүүр алхжээ.