Долоо хоногийн цомог: Adele 25

Бид энэ удаагийн хөгжмийн танилцуулгаар энэ жилийн хамгийн их хүлээлттэй байсан Аделийн 25 цомгийг танилцуулж байна

Аделийн гуравдах студийн цомог "25" эзэндээ дахин өндөр амжилт авчрах бүтээл болсон байна. Одоо 27 настай Адель Их Британийн эзэнт гүрний баатар, Грэмми, Brit Awards, Алтан бөмбөрцөг болон Оскарын шагналын эзэн билээ. Түүний 2008 онд анх гаргасан "19" нэртэй цомог өндөрт цойлж, 2010 онд гарсан "21" цомог нь Их Британийн хамгийн амжилттай цомгийн эхний тавд багтаж чадсан юм. Үүнээс жилийн дараа тэрбээр Жеймс Бонд киноны "Skyfall" ангийн дууг дуулсан нь мөн л дэлхийг шуугиулсан их амжилт дагуулсан билээ.

Адель цомог бүрийнхээ дуу бүрт маш энгийн хэрнээ маш гүн, гүнзгий сэтгэгдэл бидэнд төрүүлдэг. Тэрбээр 11 дуутай шинэ цомгоо хоёр жил гаруйн хугацаанд бичүүлж бэлэн болгосон байна. Шинэ цомогтоо Адель Бруно Марстай хамтран ажиллажээ. Харин түүний шүтэн биширдэг байсан Blur хамтлагийн гишүүн түүнтэй хамтран ажиллахаас татгалзсан. Гэлээ ч энэ нь Аделийн шинэ цомгийн амжилтыг мэдээж доош нь татахгүй биз ээ.