Биднийг хөгжмийн салбарт 2025 онд олон гайхалтай үйл явдал хүлээж байна. Энэ жил залуу уран бүтээлчдийн тэсрэлт хийсэн дебют болон алдартай дуучдын шинэ уран бүтээл бидний сонорт хүрэхээр зэхээд буй. Ингээд 2025 оны хамгийн ихээр анхаарал татаж буй 10 цомгийн мэдээллийг тоймлон хүргэе.

---

The Weeknd – “Hurry Up Tomorrow”

Цацагдах огноо: Нэгдүгээр сарын 31

The Weeknd Hurry Up Tomorrow цомгийнхоо тухай “Энэ цомог бол уран бүтээлийн оргил, оршихуйн асуудлуудыг дэлгэсэн сүүлчийн бүлэг байх болно” хэмээн хэллээ. Тус цомог нь After Hours, Dawn FM гэх цомгуудыг хамарсан гурамсан бүтээлийн төгсгөл бүлэг болох юм. Эхний хоёр цомог The Weeknd-д алдар нэр авчирсан бөгөөд түүнийг RIAA-ийн нийгэмлэгээс олгодог гурван удаагийн "Diamond" гэрчилгээтэй түүхэн дэх гурав дахь, Канадын анхны уран бүтээлч болгосон билээ.

Цомгийн нээлт уран бүтээлчийн карьерт эргэлт хийх болно. Учир нь энэ цомгийн дараа тэрээр тайзны нэрээ орхиж, өөрийн жинхэнэ нэр болох Эйбел Тесфайе нэрээрээ уран бүтээл туурвихаар болжээ. Тэрээр цомгийн тизерт карьерынхаа янз бүрийн мөчүүдээс хуваалцаж энэ санаагаа далд утгаар илэрхийлээд амжсан юм.

Түүнчлэн The Weeknd цомогт багтсан уран бүтээлүүдээсээ санаа аван бүрэн хэмжээний кино хийж байгаа ба киноны гол дүрд Женна Ортега, Барри Кеоган нар тоглохоор болжээ. Кино тавдугаар сарын 16-ны өдөр нээлтээ хийнэ.

Roddy Ricch – “The Navy Album”

Цацагдах огноо: Хоёрдугаар сарын 21

Реппер Roddy Ricch-ийн гурав дахь цомог нь 2019 онд гарсан Please Excuse Me for Being Antisocial, 2021 онд гарсан Live Life Fast цомгуудын үргэлжлэл болж байгаа юм. Түүний анхны уран бүтээл Америкийн Billboard шилдэг 200 цомгийн жагсаалтыг, The Box дуу Billboard Hot 100 жагсаалтыг тус тус тэргүүлж байжээ. Залуу уран бүтээлч сэтгэл шингэсэн үгс, амархан цээжлэгдэж аманд ордог дахилтуудынхаа ачаар хөгжмийн ертөнцөд өөрийн байр суурийг бататгаж чадсан юм. Хамгийн анх 2018 онд гарсан Die Young дуу түүнийг олноо таниулсан билээ. Тэрээр энэ дууны үгийг XXXTentacion-ийг нас бардаг шөнө бичжээ.

Lisa – “Alter Ego”

Цацагдах огноо: Хоёрдугаар сарын 28

BLACKPINK хамтлагийн гишүүн Лиса хамтлагийнхаа уран бүтээлийн хажуугаар өөрийн соло уран бүтээлийг хийж, Lloud агентлагаа нээсэн билээ. Лисагийн дебют цомог түүний бүтээлч зан чанарыг бүтээдэг таван эгогоос бүрдэж байгаа юм. Рок Рокси, тэрслүү Викси, гэгээлэг Санни, нууцлаг Спиди, 2000-аад оны стильтэй Кики нар. Тэдний зан чанар цомгийн 12 уран бүтээлээр дамжуулан илэрхийлэгдэнэ. Лиса цомгийн ажлын хажуугаар анх удаагаа жүжигчний хувиар The White Lotus цувралд дүр бүтээсэн юм. Цомогт түүний 2024 онд гаргасан Rockstar, New Woman, Moonlit Floor зэрэг дуунууд багтах магадлалтай. Түүнчлэн тэрээр томоохон хэмжээний дэлхийг тойрсон аялан тоглолт хийхээр төлөвлөгөөндөө тусгажээ.

Леди Гага – “Mayhem”

Цацагдах огноо: Гуравдугаар сарын 7

Леди Гагагийн шинэ цомгийн нэрийг шүтэн бишрэгчид нь LG7 гэж нэрлэгдэнэ хэмээн таамаглаж байсан бол цомог Mayhem нэртэйгээр гарахаар болжээ. Цомогт Disease, Die with a Smile дуунууд багтаж байгаа бөгөөд тэрээр тус цомогт DJ, электро хөгжимчидтэй хамтран бүтээсэн төрөл бүрийн жанр бүхий бүжгийн ая багтах болно хэмээн ярьжээ. Тэрээр Майкл Полански, Эндрю Уотт, Cirkut, Gesaffelstein гэхчлэн The Weeknd, Daft Punk, A$AP Rocky, Phoenix, Канье Уэст нартай хамтран ажиллаж байсан туршлагатай уран бүтээлчидтэй хамтрахаар болсон байна. Леди Гага Los Angeles Times сэтгүүлд өгсөн ярилцлагад “Цомог маш олон төрлийн жанрыг хамарсан бөгөөд хамгийн гол зүйл болох хайр дурлалыг онцолж байгаа. Яг үүний төлөө л амьдрал болон үүнийг тойрсон үймээн самуун оршдог шүү дээ” хэмээн ярьжээ.

Лана Дель Рей - “The Right Person Will Stay”

Цацагдах огноо: Тавдугаар сарын 21

Лана Дель Рей найм дахь удаагийн цомгоо кантри стилиэр туурвижээ. Өнгөрсөн жилийн Үндэсний хөгжмийн зохиолчдын холбооны шагнал гардуулах ёслол дээр тэрээр энэ жанрыг ойрын хугацаанд хамгийн ирээдүйтэй, эрэлттэй байх болно гэдгийг тэмдэглэн хэлсэн. Лана Дель Рей энэхүү цомгийн ажил дээр продюсер Жек Антоноффтай хамтран хэдэн жилийн турш ажилласан ба цомог хийгдэх тухай Stand by Your Man, Take Me Home, Country Roads зэрэг кантри хит дуунуудын ковер хувилбаруудад далд утгаар мэдээлж байжээ.

A$AP Rocky – “Don’t be Dumb” 

Цацагдах огноо: Тодорхойгүй 

Don’t Be Dumb цомгоо A$AP Rocky 2024 оны наймдугаар сард гаргахаар төлөвлөж байсан боловч нээлтийг тодорхойгүй хугацаагаар хойшлуулсан юм. Тус цомог нь уран бүтээлчийн хувьд 2018 оноос хойш гаргаж буй анхны цомог болно. Шүтэн бишрэгчид Testing цомогт багтсан ASAP Forever, Praise the Lord (Da Shine), Fukk Sleep зэрэг хит дуунуудтай тухайн үед л анх танилцаж байв. Харин шинэ цомогт Tyler, the Creator, Slick Rick, Флейвор Флейв, Баста Раймс, Жон Батист нартай хамтран хийсэн уран бүтээлүүд багтах юм. A$AP цомгоо Portishead хамтлаг болон алдарт дуучин Стиви Никсийн уран бүтээлээс хамгийн их урам зориг аван бүтээжээ. A$AP Rocky-гийн хэлж буйгаар нээлт хэд хэдэн удаа хойшлогдож байгаа нь түүний аливаа юмсыг төгс хийхийг хүсдэг зан чанартай холбоотой гэнэ. Учир нь тэрээр "бүх цаг үеийн хамгийн шилдэг цомгийг" гаргахыг хүсэж байгаа хэмээн нэгэн ярилцлагад дурджээ.

Майли Сайрус – “Something Beautiful” 

Цацагдах огноо: Тодорхойгүй 

Майли Сайрус Mandy болон Guillermo del Toro’s Cabinet of Curiosities киног найруулсан Канадын найруулагч Панос Косматостой хамтран Something Beautiful цомгийн ажлаа хийж байгаа бол продюсероор Шон Эверетт болон Liily хамтлагийн бөмбөрчин Макс Морандо нар ажиллажээ. Майли 1970-аад оны классик рок уур амьсгалыг дахин сэргээхийг хүсэж байгаа бөгөөд тэрээр Pink Floyd хамтлагийн The Wall дуунаас урам зориг аван хийж буйгаа хэлжээ. Тэрээр энэ дуунд анх өсвөр насандаа дурлаж байсан гэдэг. Энэ бол түүний карьер дахь хамгийн их туршилт хийсэн бүтээл болж байгаа ч түүний нэрийн хуудас болсон поп дуугаралт хадгалагдана хэмээн тэмдэглэн хэлжээ. Сайрус хүний амьдралын хамгийн хүнд үед туслах, анагаах чадамжтай цомог гаргахыг хүсэж байгаагаа мөн дурдсан юм.

---

Ye – “Bully”

Цацагдах огноо: Тодорхойгүй

Канье Уэст Bully цомгийн талаар өнгөрсөн оны есдүгээр сард Хятадын Wuyuan River цэнгэлдэхэд болсон Vultures 2 цомгийн сонсголын үеэр мэдээлсэн. Энэ цомог нь түүний хувьд сүүлийн гурван жилийн хугацаанд гаргаж буй анхны соло уран бүтээл болох юм. Шүтэн бишрэгчид нь энэ цомгийг 2001 онд гарсан Ларри Кларкийн ижил нэртэй киноноос улбаатай хэмээн таамаглаж байна. Уг кино бодит явдлаас сэдэвлэн бүтээгдсэн ба кинонд олон жил үеийнхнээ дээрэлхсэн Бобби Кентийн тухай өгүүлдэг. Эцэст нь түүний нөхөд доромжлол, дээрэлхэлтийг тэвчилгүй Боббиг хөнөөж буй тухай гардаг. Цомгийн хавтасны зохиогчоор хар-цагаан гудамжны зургаар алдаршсан Японы гэрэл зурагчин Дайдо Морияма ажиллажээ. Уг цомгийн продюсероор түүний эртний анд Майк Дин ажилласан нь цомгийг сонсох бас нэгэн шалтгаан болж байна. Майк Дин бол 2Pac, Jay-Z, Мадонна, Селена Гомес, Бейонсе зэрэг оддын хөгжмийн зохиолыг бичиж байсан туршлагатай уран бүтээлч юм.

Megan Thee Stallion “Megan: Act III”

Цацагдах огноо: Тодорхойгүй

Хип-хоп уран бүтээлч Megan Thee Stallion-ы шинэ цомог Megan гурамсан бүтээлийн эцсийн бүлэг болж байгаа бөгөөд Megan: Act III нэрийн дор гарахаар товлогдоод буй. Энэ бол Megan-ы хараат бус уран бүтээлчийн хувиар гаргаж буй анхны цомог болох ба тэрээр өөрийн Hot Girl Productions-ийн дор бүтээлээ туурвиж байгаа юм. Өмнө нь тэрээр 501 Entertainment, 300 Entertainment-тай хамтран ажиллаж байсан хэдий ч маргааны улмаас хамтын ажиллагаагаа зогсоожээ. Хьюстоны сэтгэл татам уран бүтээлчийг та бүхэн цахим ертөнцийг шуугиулж, Billboard Hot 100 жагсаалтыг тэргүүлсэн Savage дуугаар мэдэх нь гарцаагүй.

Түүнчлэн дуучин бүсгүй BET Awards-ын зургаан удаагийн шагнал, American Music Awards-ын дөрвөн удаагийн шагнал, MTV Video Music Awards-ийн хоёр удаагийн цом, Грэмми наадмын гурван удаагийн шагналыг тус тус хүртэж байсан түүхтэй.

---

Пол Маккартни

Цацагдах огноо: Тодорхойгүй 

Пол Маккартни сүүлийн хэдэн жилийн турш шинэ цомог дээрээ ажиллаж байгаа хэдий ч цомгийн ажил өнгөрсөн жилийн Got Back Tour-тэй холбоотойгоор удааширчээ. Тэрээр АНУ, Австрали, Европ, Латин Америкийн орнуудаар аялан тоглолтоо хийсэн байна. 2024 оны сүүлээр The Beatles хамтлагийн гишүүн асан шүтэн бишрэгчдэдээ өөрийн соло уран бүтээлийг ирэх жил гаргана хэмээн амлаж байжээ. Дашрамд дурдахад тэрээр хамгийн сүүлд 2020 онд McCartney III цомгоо гаргасан юм. Энэ цомог нь Их Британийн чартуудыг тэргүүлж, Billboard шилдэг 200 чартын хоёрдугаар байранд жагсахын зэрэгцээ Грэмми шагналд нэр дэвшиж байсан юм.