Жил бүрийн тавдугаар сарын хамгийн эхний долоо хоногийн Даваа гарагт зохион байгуулагддаг Met Gala 2023 үдэшлэг эхэллээ. Метрополитен урлагийн музейн Хувцас загварын институтээс толилуулж буй энэ хаврын үзэсгэлэн нь дизайнер Карл Лагерфельдийн загварын ертөнцөд оруулсан хосгүй хувь нэмэрт хүндэтгэл үзүүлж “Карл Лагерфельд: Гоо үзэсгэлэнгийн зураас” сэдэв дор явагдаж байна.
Карлын хувьд Chanel загварын ордноос эхлэн Balmain, Patou, Chloé, Fendi болон Karl Lagerfeld брэндийн бүтээлч захирлаар ажиллаж байсан туршлагатай бөгөөд уригдан ирсэн зочид хэлбэр силуэтын хувьд харилцан адилгүй, өөрсдийн гэсэн бие даасан онцлогтой төрхүүд бүрдүүлжээ. Мэдээж хэрэг Лагерфельдийг хамгийн сайн илтгэдэг шүр сувд болон хар, цагаан өнгөний хослол Met Gala дээр зонхилсон байв. Түүнчлэн хэд хэдэн алдартан загварын орднуудын архивд хадгалагдаж байсан гоёлыг улаан хивсэн дээр дахин амилуулсан бөгөөд жүжигчин Марго Робби тэдний нэг нь байлаа. Тэрээр 1993 онд домогт модель Синди Кроуфордын өмсөж байсан Chanel-ын бүсэлхий хэсгээрээ торон оруулгатай хар даашинзаар гоёжээ. Оролцсон улаан хивсний ёслол бүрдээ этгээд, хачин жигтэй хувцаслаж чаддаг Жаред Лето энэ удаа ч мөн арга хэмжээний гол дүр нь байж чадлаа. Тэрээр Карл Лагерфельдийн гэр бүлийн гишүүн, хайрт муур Шупетын дүрд хувирсан байв.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт