Сөүлийн загварын долоо хоног, намар-өвөл 2016: Street Style

Бид та бүхэнд зургаан өдрийн турш үргэлжилсэн Сөүлийн загварын долоо хоног дах street style зургуудыг хүргэж байна. “Загвараар өвчилсөн” солонгосчууд ямар төрх бүрдүүлснийг сонирхоцгооё

Өнгөрсөн долоо хоногт буюу гуравдугаар сарын 21-нээс гуравдугаар сарын 26-ны хооронд Сөүлийн загварын долоо хоног болж өнгөрлөө. Намар-өвөл 2016 улирлын загварын долоо хоног Заха Хадидын дизайнтай Dongdaemun Design Plaza (DDP) барилгад нээлтээ хийсэн байна. Ази тивийн тэргүүлэх зах зээлийн нэг болох Өмнөд Солонгосын хамгийн сүүлийн үеийн загварын трендийг үзэхээр Vogue, W Magazine, L'Officiel Hommes ба Dazed & Confused гэх алдарт сэтгүүлүүдийн нэр хүндтэй редакторууд, Harrods, Selfridges ба Barneys New York гэх томоохон дэлгүүрүүдийн төлөөлөгчид, болон Виктория Бекхэм, Николас Кирквуд, Симон Коллинс ба Жастин О'Ши гэх зэрэг чадварлаг дизайнерууд нэг доор цугларчээ. Загварын долоо хоногийн салхийг хагалж Komman брэндийн Yoo Hye-jin дизайнер оролцсон бөгөөд нийт 41 дотоодын шилдэг дизайнерууд өөрсдийн шинэ цуглуулгаа танилцуулаад амжлаа.

Харин загварлаг солонгосчуудын street style-ийн хувьд гэвэл урьд өмнөхөөсөө илүү өнгөлөг, сонирхолтой бас этгээд байж чадлаа. Төгс эсгүүртэй хослол ба даашинзыг хөлд эвтэйхэн кеттэй хослуулсан бүсгүйчүүд, urban chic хэв маягаар хувцасласан залуучууд, мөн сүүлийн трендийг дагасан өхөөрдөм бяцхан хүүхдүүд Сөүлийг гудамжийг чимлээ. Цагаан, ягаан, цэнхэр, шар, шаргал, ногоон гээд солонгын бүхий л өнгийн үс street style сурвалжлагаас харагдах болно.