Алдарт Final Destination кино 14 жилийн дараа эргэн ирлээ

Анх 2000 онд нээлтээ хийж байсан алдарт Final Destination франчайзын цоо шинэ буюу зургаа дахь анги Final Destination: Bloodlines нэртэйгээр тун удахгүй үзэгчдийн хүртээл болоход бэлэн болжээ.

Хачирхалтай байдлаар үхлээ урьдчилан харж, үүнээс зайлсхийхийг хичээж буй залуусын тухай өгүүлдэг тус бүтээлийн шинэхэн ангид Spider-Man: Homecoming цувралын найруулагч Жон Уоттс зохиолч, продюсероор ажилласан нь кино сонирхогчдын анхаарлыг багагүй татаад байгаа гэнэ. Харин энэ удаагийн ангийн үйл явдал нэгэн коллежийн оюутан бүсгүй Стефанигийн эргэн тойронд өрнөнө. Стефани гэр бүлийнхнээ үхлийг урьдчилан харж, улмаар тэднийг аврах гэж хичээнэ. Гэвч бүсгүй гэр бүлээ хамгаалах гэж оролдох тусам тэднийг илүү аймшигт үйл явдал хүлээж байснаар кино цааш үргэлжлэх аж.

Шинэ ангийн гол дүрүүдэд жүжигчин Рая Килстедт, Брек Бассингер, Алекс Захара нар тогложээ. Мөн Final Destination франчайзын хамгийн чухал дүрүүдийн нэг болох Уильям Блюдворт шинэ анги дээр эргэн ирж байгаа боловч тус дүрийг бүтээсэн жүжигчин Тони Тодд өнгөрсөн оны арваннэгдүгээр сард харамсалтай нь өөд болсон билээ. 

Final Destination: Bloodlines кино ирэх тавдугаар сарын 16-нд зөвхөн кино театруудаар нээлтээ хийхээр болсон байна.